පෞද්ගලික විශ්ව විද්‍යාලවලින් උපාධිය ලබා ගන්නා අධ්‍යාපනවේදී උපාධිධාරීන් ශ්‍රී ලංකා ගුරු සේවයට බඳවා ගැනීමේදී, ඔවුන්ගේ උපාධියේ ගුණාත්මකභාවය පිළිබඳ ගැටලුකාරී තත්ත්වයක් මතුව ඇති බව, මේ වන විට හඳුනා ගෙන ඇති බවත් ඒ පිළිබඳ අධ්‍යාපන අමාත්‍යාංශය මට්ටමින් සමාලෝචන ක්‍රියාවලියක් ආරම්භ කර ඇති බවත් අධ්‍යාපන, උසස් අධ්‍යාපන හා වෘත්තිය අධ්‍යාපන අමාත්‍ය, ආචාර්ය හරිනි අමරසූරිය ප්‍රකාශ කළා ය.
අමාත්‍යවරිය මේ බව ප්‍රකාශ කළේ 2025.06.14 වන දින ගුරු-විදුහල්පති සමිති සන්ධානයේ නියෝජිතයන් සමඟ ඉසුරුපාය, අධ්‍යාපන අමාත්‍යාංශ පරිශ්‍රයේදී පැවති සාකච්ඡාවක් අමතමිනි.
මෑතකාලින ලබා දුන් අධ්‍යාපනවේදී උපාධිධාරී ගුරු පත්වීම් නව රජය බලයට පත් වීමට පෙර අනුමත වූ පත්වීම් බවත්, එම පත්වීම් ලබා දී ඇත්තේ ගුරු සේවා ව්‍යවස්ථාවේ විධිවිධානවලට අනුකූලව බවත් අමාත්‍යවරිය සඳහන් කළා ය. එසේ වුව ද එලෙස ලබා දුන් පත්වීම් පිළිබඳව ද, රජයේ අනුමත පෞද්ගලික විශ්ව විද්‍යාලවල සහ අනුබද්ධ උසස් අධ්‍යාපන ආයතනවල අධ්‍යාපනවේදි උපාධියේ ගුණාත්මකභාවයද නැවත සමාලෝචනය කිරීමට අධ්‍යාපන අමාත්‍යාංශය මට්ටමින් කටයුතු ආරම්භ කර ඇති බව අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍ය, ආචාර්ය හරිනි අමරසූරිය ප්‍රකාශ කළා ය.
මෙම සමාලෝචන ක්‍රියාවලියට අනුව ඉදිරියේ දී ශ්‍රී ලංකා ගුරු සේවයට බඳවා ගන්නා අධ්‍යාපනවේදී උපාධිධාරීන්ගේ ගුණාත්මකභාවය පිළිබඳ අධ්‍යාපන අමාත්‍යාංශය ක්‍රියාමාර්ග ගන්නා බව ද ගුරු - විදුහල්පති නියෝජිතයන් හමුවේ අමාත්‍යවරිය සඳහන් කළා ය. එම සාකච්ඡාව සඳහා කම්කරු නියෝජ්‍ය අමාත්‍ය මහින්ද ජයසිංහ, අධ්‍යාපන අමාත්‍යාංශයේ වැඩ බලන ලේකම් අමල් එදිරිසූරිය ඇතුළු නිලධාරීන් පිරිසක් ද සහභාගී විය.
